БИШКЕК, 30-июль. (КАБАР). Бүгүн түштөн кийин президент Роза Отунбаева Ош шаарындагы “Ош району” деп аталган  кичирайондо болуп, ал жерде үйлөрү өрттөнүп кеткен кыргыз үй-бүлөлөрү менен жолугушту. Жолугушууга шаар мэри М. Мырзакматов, Ош облусунун коменданты Б. Алымбеков, вице-премьер-министр-Ош жана Жалал-Абад шаарларын калыбына келтирүү боюнча мамлекеттик дирекциянын директору Ж. Сатыбалдиев жана башкалар катышты.

            Жабыркаган 16 үй-бүлө үй-жайы менен кошо бардык документтер  өрттөнүп кеткендигин, ушундан улам тиешелүү органдарга кайрыла алышпай жаткандыгын билдиришти. Ошондой эле аларга гуманитардык жардам керектүү өлчөмдө берилбей жаткандыгына нааразычылыктарын айтышты. Жабыркагандардын айтымында, алар жашаган кичи район өзбек махалясы болгондуктан, каргашалуу окуя башталганда, тагыраак айтканда, 11-июнь күнү түнкү саат 23.00дө алар комендатура кызматкерлери тарабынан шашылыш көчүрүлүп кеткен. Көзөмөл кыла турган адам калбагандыктан, алардын үй-жайы толук өрттөлгөн.

            Р. Отунбаева аталган кичи райондо жабыркагандардын тизмесин түзүп, аларга зарыл жардамдар көрсөтүлө тургандыгын билдирди. Мында турак-жай курууда үйдүн 100 чарчы метрине кеткен чыгым мамлекет тарабынан берилээри, калганы донорлор көрсөтө турган жардамдын эсебинен толукталаары маалымдалды. Ал эми үйү чоң болуп, көрсөтүлгөн жардамдан көп каражат корото турган үй-бүлөлөргө узак мөөнөттүк насыялар берилет.

            Мындан тышкары жолугушууга катышкандар учурда турак-жайы жок болгондуктан, туугандарыныкында жүргөндүктөрүн, күз келсе балдарын кайсы мектепке жөнөтөөрүн билишпегендигин айтышты. Шаар башчысы М. Мырзакматов бул маселени билим берүү башкармалыгы менен бирге карап, оң жагына чечип бере тургандыгын билдирди. (Канатбек Абдырахман уулу)