Баткен 30-июль (КАБАР) Облустун  губернаторунун милдетин аткаруучу Султанбай Айжигитовдун  айтымында Кыргызстандын 400 гектар аймагында Өзбекстандын  134 газ скважинасы бар. Ал эми  40  мунайзат скважинасынын 18и оң абалда болуп  бүгүнкү күндө 1300метр тереңдиктен мунайзатын сордуруп алууда. Ошондой эле Өзбекстан тарап  1,5 миң гектар жерди газ камоочу жай катары пайдаланып келет. Ошол эле учурда ал аймакта  газдын 5 миллард метр куб жана мунайдын 600 миң тонна кору бар. 

 Облус башчысынын айтуусу боюнча мунайзат скважиналары аркылуу Өзбекстанга күнүнө 20 тонна мунайзат жер астындагы түтүктөр аркылуу агып кетүүдө.

“Өзбекстанга кетип жаткан мунайзатты жана газды токтотууга жасаган аракетибиз оңунан чыкпай жатат. Кыргызстандагы мунайзат  жана газ компанияларынын ээлеринин түшүнүксүз мамилесинен улам, ал байлыкка облустун ээ болуусуна мүмкүнчүлүк болбой жатат”, деп айткан облус губернаторунун милдетин аткаруучу КР Президенти менен жолугушуу учурунда..

Өзбекстандын 1950-жылдардан бери Баткен облусунун аймагындагы аталган газ жана мунайзат скважиналары,  жерге төлөнүүчү карыздары 665 млн. сомго жетти. Бул боюнча өзбек тарапка облустук бийликтин билдирүүлөрү азырынча жоопсуз калып келүүдө. (М. Бердишев)