БИШКЕК, 30-июль. (КАБАР). Кыргызстандыктар массалык түрдө Россияга кеткен жок. Мындай маалыматты бүгүн Бишкекте өткөн маалымат жыйынында Эмгек, ишке орноштуруу жана миграция министрлигинин алдындагы жарандарды чет өлкөдө ишке орноштуруу борборунун директору Нурдин Тынаев билдирди.

            Анын айтымында, үстүбүздөгү жылдын июнь айында Кыргызстандын түштүгүндө болгон каргашалуу окуялардан кийин Россияга иштеп келүүнү каалагандардын саны чындыгында эле өскөн. Муну темир жолу бекети  менен автобекеттеги абал көрсөткөн. “Бирок Россияга массалык түрдө калктын көп агымы кетип жатат деп айтууга болбойт. Мурдагыга караганда ал жакка барып иштөөнү каалагандардын саны көбөйгөнү менен айрым өлкөлөргө салыштырмалуу бизде бул көрсөткүч анчалык көп эмес”, - дейт Н. Тынаев.

            Мындан тышкары ал расмий маалыматтар боюнча Россиянын аймагында убактылуу жана туруктуу иштегендердин саны 350 миң кыргызстандык экендигин белгилеп, мыйзамсыз жүргөндөрдүн саны мындан кыйла көп экендигин айтты. Н. Тынаев Россияда эмгек мигранттар үчүн жеңилдик берген ишке орношуу үчүн патент алуу жөрөлгөсү мыйзамсыз жүргөндөрдүн санын кыскартат деген оюн айтты. (М. Ибраева)