Ош 30-июль (КАБАР) Ош облусунда иш сапар менен жүргөн Мамлекет башчысы Роза Отунбаева Кара-Суу районуна караштуу “Шарк” айыл өкмөтүндөгү Таштак айылынын жашоочулары менен жолугушту. Президент айрым өрттөнгөн үйлөрдү көрүп чыкты. Жолугушуу учурунда тополоңдо жабыр тарткан айылдыктар Кыргызстандын Президентине жана Убактылуу өкмөткө көңүл буруп жаткандыгына ыраазычылык билдиришип, мындан ары да алардын жүргүзүп жаткан аракеттерин колдой тургандыктарын бир ооздон айтышты. Алар референдум убагында да бийликти колдоого алышкан. Жолугушуу учурунда ишкерлерге да жардам болобу деген суроо берилди. Мамлекет башчысы сөзсүз түрдө аларга да колдоо көрсөтүлө тургандыгын айтты. Жакында эле аларды колдоо боюнча УӨ атайын декреттери да жарыкка чыккан.

Ушул эле жерде КР вице-премьер-министри, Ош жана Жалал-Абад облустарында калыбына келтирүү иштерин жүргүзүү мамлекеттик дирекциясынын башкы директору Жантөрө Сатыбалдиев Таштак айылынын үйү өрттөнгөн жашоочулары үчүн салына турган үйлөрдүн кагазга түшүрүлгөн долбоору менен жеринде тааныштырды. Анын маалыматына караганда эки кабаттуу, бардык шарттары бар беш квартиралуу үйлөр салынып, суук төшкөнчө пайдаланууга берилмекчи. Азырынча 40 үй тургузуу пландалууда. Дирекциянын мындай аракеттерине ыраазы болушкан айылдыктар алардын запкы көргөн калк үчүн жасап жаткан иштерине ийгилик каалашты.

Түштөн кийин Роза Отунбаева Ош шаарында дайынсыз жоголгондордун тууган-туушкандары менен жолугушмакчы. (Канатбек Абдрахман уулу, фотосу автордуку)